घर जानु अगी

आज परीक्षा सकियो. त्यति राम्रो त भएन तै पनि परीक्षा सकिनुको छुटै मज्जा छ. बल्ल बल्ल केहि दिन कै लागि भए पनि मेसिन जस्तो जिन्दगी बाट छुट्टी मिलेको छ. म यो समयलाई जति सक्दो राम्ररी उपयोग गर्न चाहन्छु, मैले धेरै सोचे के गर्दा छुट्टी राम्रो र रमाइलो हुन्छ होला, आखिरमा एउटा राम्रो जुक्ति आयो दिमागमा, एक्कासी मनले भन्यो म घर जान्छु.

मेरो घर, जहाँ म संसार भरिका खुसीहरू पाउन सक्छु, आफ्नो मनलाई जसको सामु पनि निर्धक्क फुकाउन सक्छु. मलाई घरमा बस्न पाउनु संसारका सारा खुसीहरू मध्येको उत्तम लाग्छ. अझ डेरामा दुइटा कोठामा खुम्चिएको जिन्दगीले फैलिनका आकाश पाए जस्तो लाग्नु आफ्नो ठाउँमा छदै नै छ. मलाई एकदम खुसि लगेर आउछ जब मेरा भतिजाहरु बाटामै मेरो झोला लिन आइपुग्छन, कसैबाट आधि बाटैमा हात समाउदै आफ्नो प्यारो घर लगिनुको खुसि म कसै गरेपनि लेख्न सक्दिन.

मेरो घरमा सबै जना आज बिहानै देखि बाटामा आखा फिजाएर बसी रहेका हुन्छन, मेरो दाई, भाउजु, ममी, बुबाको आत्मियता. मलाई कति बेला घर पुगेर फेरी एक पटक यो अनुभव लिउ जस्तो भैरहेको छ.

Advertisements

मेरी हजुरआमा

मेरी हजुरआमा, तिन छोरा र पाँच छोरीहरुकी आमा, २९ नाती-नातिना र अझै धेरै पनाति-पनातिनीहरुकी आफ्नै ममतामयी धरोहर हुनुहुन्छ. उहाँको अनौठो बिसेषता हामी यति धेरै हाँगा हरु उहाँबाट फैलिएका छौ तर पनि हामी हरेकको लागि उहाँ बिसेष हुनुहुन्छ. म सुन्थे हामी सानै देखि एक-अर्का संग विवाद गर्थ्यौ कि हजुरआमाले सबै भन्दा बढी मलाई माया गर्नुहुन्छ.

म कहिले बिर्सिन सक्दिन उहाँ बाट पाउने साना-साना तर मुल्यवान उपहारहरु, ति जे पनि हुन सक्थे एउटा मिश्रीको डल्लो, मिठो कसैले उहाँलाई भनेर ल्यैदिएको कुरौनी, उहाँको पुरानो र हाम्रो लागि संसारको सबै भन्दा बढी पैसा भएको थैलीबाट दिएको १ रुपयांको नोट आदि आदि. अनि म ठान्थे उहाँले मलाई जति माया सायदै कसैलाई गर्नु हुन्छ.

आज सम्झिन्छु. मेरो उमेर पनि बढ्दै छ, म पक्का बयस्क बन्दै छु, वोली मेरा पनि यस्तै धेरै हाँगाहरु फैलिएलान, म पनि हजुरबुबा बनुला तर के म सक्छु होला तेसरी सबैको लागि उतिनै माया पुर्याउन? तर मेरी हजुरआमाले मलाई तै शिक्षा दिनु भएको छ, सबैलाई माया गर. सबैको लागि उतिनै आत्मियता, उतिकै न्यानोपन, उही सम्झनाहरु.

मेरी हजुरआमा आज पनि मलाई उस्तै गर्नुहुन्छ जब म उहाँको अगाडी पुग्छु एउटा सानो मिश्रीको झझल्को सधै आउछ, कुरौनी बासना मनमा उस्तै गाढा छ. म आज पनि जब उहाँको हात मेरो शिर माथि पाउछु, म मन-मननै भन्छु, मेरी हजुरआमाले मलाई जति माया अरुलाई सायदै गर्नु हुन्छ.